ကျွန်တော်နှင့် ဂျင်မခါနာ



လွန်ခဲ့သောနှစ်ရက်ခန့်က ဗဟိုအမျိုးသမီးဆေးရုံ နှစ် (၁၂၀) ပြည့်အခန်းအနား ကျင်းပသည့်သတင်းကို ဖတ်မိရာ မိမိချက်မြှုပ်ရာနေရာ (အမှန်တော့ စွန့်ပစ္စည်း အဖြစ် ဖျက်ဆီးပစ်ရာနေရာ) မို့ စိတ်ဝင်စားစွာဖတ်ရှုမိလေသည်။ သတင်းတို့ထုံးဆံ မည်သူတွေတက်ရောက်ပြီးသကာလ မည်သူတွေ အမှာစကား ပြောကြားကာ မည်သူတွေက ဖဲကြိုးဖြတ် ဖွင့်လှစ်ပေးကြသည်ကို ဦးစားပေးရ သဖြင့် ဆေးရုံ၏ သမိုင်းကြောင်းမှာ မှုံပြပြသာ (၁၈၉၇ ခုနှစ်တွင် စတင် ဖွင့်လှစ်သည်) ဖေါ်ပြ ပါရှိပါ၏။ သို့သော် ထိုမှုံပြပြသည်ပင်လျှင် ကျွန်တော့်စိတ်အစဉ်ကို လွှမ်းခြုံသွား သည်ဖြစ်၍ လက်လှမ်းမီသမျှ အချက်အလက်များအား ကိုယ့်ဘာသာကိုယ် ရှာဖွေမိတော့၏။ ကျွန်တော့်ကို အမိဝမ်းမှ ကျန်းမာစွာ ပကတိ  မွေးဖွား သန့်စင် ပေးခဲ့သော ဆေးရုံဖြစ်သည်မဟုတ်ပါလား။ လက်လှမ်းမီသည်မှာ လက်ကသုံး တောင်ဝှေး ပမာ အသုံးပြုနေကျ လပ်တော့ကွန်ပြူတာ တစ်လုံးသာဖြစ်ပြီး ရှာဖွေမွှေနှောက်ရသည် ကလည်း နှစ်တစ်ရာစာမို့ စိတ်သွားတိုင်းကိုယ်မပါ သလိုတော့ ဖြစ်ရသည်။ 

ဆေးရုံ၏နောက်ကျောတွင် မြို့ပတ်ရထားလမ်းရှိရာ ယင်းနှင့်ကပ်လျက်ဘူတာကို ဂျင်မခါနာဘူတာ ဟု ခေါ်ပြီး ဆေးရုံရှေ့မစ်ရှင်လမ်း (ယ္ခု မင်းရဲကျော်စွာလမ်း) ပေါ်ရှိဘတ်စကားမှတ်တိုင်ကို (ယခင်က က.ပ.ရ အမှတ် (၁၂) လိုင်းကားများ ဖြတ်သန်းပြေးဆွဲဘူးသည်) ဂျင်မခါနာမှတ်တိုင်ဟုခေါ်ကြောင်း ကျွန်တော် သိပြီးဖြစ်သည်။ (စကားချပ်။ ဘာကြောင့်မှန်း တော့မသိ ဆင်သေကိုပင်ဆိတ်ရေနှင့် မလုံ လုံအောင်ဖုံးရမှ အားရကျေနပ်ကြသူတွေက ကျွန်နံ့ပျောက်အောင်ဆိုပြီး သမိုင်းဝင်နာမည်တွေ ရောသမမွှေခဲ့ကြသော်လည်း အနှီ ဂျင်မခါနာ ပါမသွားခဲ့။) ဆရာကြီး ရွှေဥဒေါင်း၏ ဝတ္ထုတွေထဲမှာတွေ့ရတတ်သော မျက်နှာဖြူများသာ ဝင်ဆန့်သည့် ဂျင်မခါနာကလပ်က ထိုနေရာနှင့်ဆို ခရီးတစ်မိုင်ခန့် ဝေးသည့် ပြည်လမ်း ဘက်အခြမ်း ဟယ်လပင် (ပြည်ထောင်စုရိပ်သာ) လမ်းမှာရှိခဲ့သည်မို့ ထိုကလပ်ကိုမှီ၍ ထိုဘူတာ အမည်တွင်ခြင်း မဖြစ်တန်ရာ။ သို့သော် ကလေးဆေးရုံနေရာမှာ ဂျင်မခါနာကစားကွင်း နှင့် ရေကူးကန်ရှိခဲ့ဘူးသည်ဆိုရာ ယင်းကို မှီ၍ ဂျင်မခါနာ အမည်တွင်ခြင်း ဖြစ်နိုင်သည်။ ဆေးရုံနှင့်မဆိုင်။ ရှာ၍ရသမျှ တိုရေရှားရေ အွန်လိုင်းဆေးရုံသမိုင်းမှာ လော့ဒပ်ဖရင် ကတော် လေဒီဒပ်ဖရင်ကို အစွဲပြု၍ ဒပ်ဖရင် ဆေးရုံဟုခေါ်ဆို ခဲ့ကြောင်းဖေါ်ပြကြပြီး စတင်တည်ထောင်သည့် ခုနှစ်ကို ၁၈၈၇ ဟု ပြောထားသည်။ ထိုမှတစ်ပါး အခြားဆက်စပ် စာသားဓာတ်ပုံ မတွေ့ရ။ ကျွန်တော်တို့ ငယ်စဉ်အောက်ကြည့်မြင်တိုင်လမ်းမ ချန်မာဖီလမ်း (ယ္ခုအမည်မသိ) ထိပ်မှာ ဒပ်ဖရင်သားဖွားဆေးရုံ ဆိုင်းဘုတ်နှင့် ပြင်ပလူနာကုဌာနတစ်ခုရှိခဲ့ဘူးသည်။ သို့သော် ဆေးရုံနှစ်ခုက ယ္ခုခေတ်အလိုအရပင် အတန် ကွာဝေး နေသည်။ သို့ဖြစ်ရာ ဂျင်မခါနာဘူတာ အနီးက ဆေးရုံအမည် ဒပ်ဖရင်ဖြစ်နေသည့်ရာဇဝင်ကို တိတိပပ ကျွန်တော် မစူးစမ်းနိုင်ခဲ့။ သိပ်ပြီး အရေးကြီးလှသည် မဟုတ်သည့်တိုင် သည်ဆေးရုံကို ဂျင်မခါနာဆေးရုံဟု မှတ်ယူထားခဲ့ဘူးသည့် အတွက် သည်မျှကျွန်တော် အားထုတ်ခဲ့ခြင်းဖြစ်၏။ သို့သော် အရာမရောက်။ ထားတော့။

အမေက ကျွန်တော့်ကိုဂျင်မခါနာမှာမွေးသည်ဟုပြောခဲ့ဘူးပြီး ကျွန်တော့်ပတ်ဝန်းကျင်မှာလည်း ထိုဆေးရုံကို (ဗဟိုအမျိုးသမီးဆေးရုံခေတ် မှာပင်) ဂျင်မခါနာဟုသာ မှတ်ယူပြောဆိုခဲ့ကြသဖြင့် (ဆေးကျောင်းသား ဆရာဝန်စသည့် ဆေးဘက်လောကသား တွေကမူ ဟိုတုန်းကတည်း က ဒပ်ဖရင်ဟုသုံးစွဲလေ့ရှိကြကြောင်း သတိပြုမိခဲ့ရာ ပညာတတ်အခေါ်နှင့်အရပ်အခေါ်ကွာခြားသည်ဟုသာ မှတ်ယူရမည်သို့ရှိ၏။) ကျွန်တော် ကတော့ ထိုဆေးရုံကို  ဂျင်မခါနာဆေးရုံဟုပင် ဆက်လက်စွဲမြဲနေလိမ့် ဦးမည်ဖြစ်လေသည်။ သည်ဆေးရုံ အပါအဝင် ဂျင်မခါနာ ရပ်ဝန်းမှာ ဘဝ၏ အထင်ကရမှတ်တိုင်အချို့ ရှိနေခဲ့ ကြသည်လည်းဖြစ်ရာ ယ္ခုသို့ ခေတ် အဆက်ဆက် (ကိုလိုနီခေတ် လွပ်လပ်သော ပါလီမန်ခေတ် ဆိုရှယ်လစ်အာဏာရှင်ခေတ် စစ်အာဏာရှင်ခေတ် တစ်ကျော့ပြန်ဒီမိုကရေစီခေတ်) ဖြစ်ပျက်မျိုးစုံ အဖုံဖုံသော လောကဓံတို့ကို ကြံ့ကြံ့ခံလျက် အသက်တစ်ရာ့နှစ်ဆယ်တိုင်သည့်အတွက်ကို (ဆိုင်သည်မဆိုင်သည်အပထား) အမှန်ပင် ကျွန်တော် ဝမ်းမြောက်ရသည်။ အနည်းဆုံး ခရိုနီတွေလက်တွင်း သက်ဆင်း မသွားခဲ့သည်ပင် အဟောဝတ ပြောရမည့်အခြေပေကိုး။

သည်ဆေးရုံအသက်ခြောက်ဆယ်နီးပါး၌ (တိတိကျကျပြောရလျှင် ငါးဆယ့်ခုနှစ်နှစ်) တစ်ရက်သောအခါမှာ သူ့ထံသို့ အားကိုးတကြီး ရောက်လာသော သူဆင်းရဲမိန်းမရွယ်တစ်ဦး၏သန္ဓေသားကို အယုတ်အလတ် အမြတ် မရွေးဘဲ မွေးဖွားပေးခဲ့ရာ ထိုသန္ဓေသားမှာ ကျွန်တော် ဖြစ်လေသည်။ ထိုစဉ် အမေတို့က ရှမ်းလမ်းမ ပေါ်ရှိ စာဖြူသင်းချိုင်းဟု ခေါ်ကြသော ကရင်သင်္ချိုင်းကုန်းရှေ့မှာ အများနည်းတူ ကျူးကျော် နေထိုင်ကြ၏။ နောင်မှ သရက်တောလမ်းတွင် မြေကွက်ဝယ်ကာပြောင်းရွှေ့ခဲ့ကြခြင်းဖြစ်သည် (နောက်တော့ ထိုမြေကွက်ကိုပင် ဖေဖေက ချရောင်းပြီး ကပ်လျက်အစ်မဖြစ်သူမြေကွက်မှာ အိမ်အတူဆောက်ကြရာမှ ကျွန်တော်တို့တစ်သက်တာ မြေရောအိမ်ပါ မဲ့သွားခဲ့ရ သည်ဟု အဆိုရှိခဲ့ လေသည်)။ ဆရာဝန် ဆရာမတွေ သဘောကောင်း မကောင်း အမေဝေဖန်သံ မကြားသလို ဘယ်၍ဘယ်မျှ ကန်တော့ရသည်ဟု ပြောသံလည်းမကြားရ။ သို့သော် ခလေးမှားသည့်အကြောင်းကိုတော့ အခါသင့်သလို ပြောလေ့ပြောထရှိသဖြင့် ကျွန်တော် ကောင်းစွာ မှတ်မိနေသည်။ သည်လိုဆိုပြန်တော့လည်း မွေးကတည်းက စွန့်စားခန်းများနှင့် ကျွန်တော် ဟု ဆိုရမလိုဖြစ်နေပြန်၏။ 

ခုခေတ်တိုးတက်သောနိုင်ငံတွေမှာပင် မွေးကင်းစခလေးမှားတတ်ကြသေးရာ လွန်ခဲ့သောနှစ်ပေါင်း ခြောက်ဆယ်ကျော်က ဖြစ်ရပ်အတွက် မည်သူ့ကိုမျှအပြစ်တင်စရာမလို။ အမေပြန်ပြောသမျှမှာလည်း အပြစ်တင်လိုခြင်းအလျှင်းမပါ ပြောစမတ်ဆန်းပါတဲ့ လောကဓာတ်ခန်းတစ်ရပ် အဖြစ်သာ ပြန်လည်ကာ ဖေါက်သည် ချ ခြင်းဖြစ်ပြီး ပြောသည့်အချိန်တိုင်းမှာလည်း ရယ်ရယ်မောမောဖြစ်သည်။ အထူးသဖြင့် ကျွန်တော် ပါဝင်နားထောင်နေသည့် အခါမျိုး၌ “အဲသည်တုန်းက ငါသာအမှုမဲ့အမှတ်မဲ့နေခဲ့ရင် ခုလောက်ဆို မင်း ကုလားအမျိုးထဲရောက်နေပြီ” ဟုပင် ကျီစားရင်းစကားလက်စသတ်လေ့ရှိ၏။ ကျွန်တော်နှင့်မှားသော ခလေး၏မိခင်မှာ အမေ့ထက်အသက် အနည်းငယ်ကြီးပုံရသော ဆာရီဝတ် ကုလားမကြီးတစ်ယောက် ဖြစ်ခြင်းက ထိုဇာတ်လမ်းကို ပို၍အသက်ဝင်စေခဲ့သည်။ ပြီးတော့ ကျွန်တော့် ဒူးခေါင်းမှ မွေးရာပါ အမှတ်အသား ကြောင့် ဇီဝမိခင်တွေသူတို့ရင်သွေးများနှင့် တစ်သက်တာ ကွဲကွာကြ ရမည့်အရေးမှ ကင်းဝေး ခဲ့ကြရသည်မှာလည်း အဓိက အခန်းမှ ပါဝင်နေသည်။ 

အမေ့အကင်းပါးပုံကိုလည်း စံတင်သင့်သည်ဟု ကျွန်တော်ထင်သည်။ ရက်သားအရွယ်ကလေးငယ်ချင်း တော်ရုံ ခွဲခြားရန်မလွယ်သည်မှာ ဆေးရုံတွေမှာ မွေးပြီးပြီးခြင်း အသေးစိတ်အချက်အလက်နှင့်တစ်ကွ တံဆိပ်တွေ လက်ပတ်တွေ (ယ္ခုခေတ် ချစ်ပ်စ တွေ) ဖြင့်ခွဲခြား သည့်ကြားမှပင် မကြာခဏမှားနေကြခြင်းက သက်သေခံ၏။ ကျွန်တော်တို့ကိုလည်းထိုနည်းအတိုင်း မှတ်သားထားပါလျက် လက်ပတ်တွေ ပျောက်သွား သဖြင့် နို့တိုက်ချိန်တွင် သူနာပြုဆရာမ၏ ဆဌအာရုံစေစားရာမိခင်ထံ နို့သက်ခံရန်ရောက်ကြရ ခြင်းဖြစ် လေသည်။ အမေ့စကားအတိုင်းဆိုလျှင် ထိုနေ့ကဧည့်ချိန်လည်းဖြစ်သည်မို့ ရောက်လာသော ဧည့်သည်နှင့် စကားပြောဆဲ ဆရာမလာပေးသောခလေးကို ရင်ခွင်မှာ ထားကာ ဆက်ပြောနေခဲ့သည်။ ခဏအကြာ နို့တိုက်တော့မည်ဟု ကြည့်မိသည့်အခါတွင်မှ မိမိခလေးမဟုတ်သလို ခံစားရသောကြောင့် သေချာစေရန် အနှီးအောက်မှ ယာဘက်ဒူးခေါင်းအား စစ်ဆေးကြည့်ပြီး မှားယွင်းမှုကို အတည်ပြုနိုင်ခဲ့သည်။ ဆယ်စုနှစ် တစ်ခုကျော် (ကျွန်တော်ဆယ်ကျော်သက်အရွယ်မှာ ပြောသည့်အခိုက်) က အတိတ်ကို ဆောင်နေခြင်း ဖြစ်ပါလျက် အမေ့မျက်နှာပေါ်မှ စိုးရိမ်စိတ်တွေကို ကျွန်တော် အထင်းသား မြင်နေရသလိုရှိလေသည်။ တိုတိုပြောရလျှင် အမေက တာဝန်ကျသူနာပြုဆရာမကြီးကို အော်ခေါ်ကာ ကလေးမှားနေသည်ဟုပြော ဆရာမတွေက ကလေးတစ်ဦးချင်းလိုက်စစ်ရာမှ အခန်းဒေါင့် ကုတင်ပေါ်ရှိ ဆာရီခြုံကုလားမကြီး တစ်ဦး၏ ရင်ခွင်ထက်မှာ နို့ဝပြီးအိပ်မောကျနေသည့် ကျွန်တော့်ကို တွေ့ကြရသော ဟူ၏။

ထိုဇာတ်လမ်းနောက်ဆက်တွဲများအဖြစ် “နင်က ကုလားမနို့စို့ထားလို့ အသားမဲတာ” ဟု ကျွန်တော့် အထက်က အစ်မဖြစ်သူနှင့် စကားနိုင်လုသည့်အခါ “အဲဒါဘာဖြစ်လဲ နင်တို့စို့ချင်တိုင်း စို့လို့ရလို့လား” ဟု ပြန်ပက်ရသည့်အလုပ် (တရုပ်သွေးနှောသာ မောင်နှမတွေထဲမှာ ကျွန်တော်က အသားအညိုဆုံး)၊ “ကုလားနို့ စို့တဲ့ ကုလားသားး” ဟု ကျွန်တော့်အောက်ညီက စိတ်အခန့်မသင့်ချိန် ပြောလျှင် “မင်းက နွားနို့စို့တဲ့ နွားသား”  ဟု မခံချင်စိတ်ဖြင့် မိဘတွေပါ မနေရအောင် ပြန်ပြောရသည့်အလုပ် (ကျွန်တော့်ညီ ငယ်စဉ်က အမေ နို့မျက်သဖြင့် နို့ဘူးတိုက်ရဘူးသည်) တို့ ပါဝင်လာသည်။ တော်လှန်ရေး ကောင်စီ လက်ထက် နိုင်ငံခြားသား တွေ အစုလိုက် အပြုံလိုက်စွန့်ခွာကြရာ၌ မိုဟာမဒီသင်္ဘောနှင့် အိန္ဒိယနိုင်ငံသား အပြီးပြန်တို့၏သတင်းကို ဖတ်ရသည့်အခါများတွင်လည်း ခလေးမှားတုန်းကသာ မသိလိုက်ရင် ငါလည်း အဲသည်သင်္ဘောကြီးနှင့်ပါနေလောက်ပြီဟု အားအားလျားလျားတွေ့မိသည်အထိ ဖြစ်သည့်အခါ ဖြစ်တတ် ရလေသည်။ (စကားချပ်။ ဤစာတွင် ကုလားဟု ရေးသားသုံးစွဲသမျှမှာ မည်သို့သော အမိ်ျုးဘာသာ အယူအစွဲ အနှောင်အဖွဲ့မျှ ပါဝင်ခြင်းမရှိကြောင်း ဖေါ်ပြလိုပါသည်။)

မွေးရာပါအမှတ်အသားများသည် လူကိုအကျိုးပြုတတ်သည်ဆိုသောအယူအဆသာရှိလျှင် ကျွန်တော့် ဒူးခေါင်း ပေါ်က အမှတ်အသားကလည်း သည်တစ်ချက်တည်းနှင့် ကျွန်တော့်ကို ကောင်းစွာအကျိးပြုသည် ဆိုရမည်။ ထိုအမှတ်ဖြင့်သာ ထင်ရှားသက်သေမပြနိုင်ခဲ့လျှင် သူ့ခလေး ကိုယ့်ခလေး အတည်ပြုလက္ခံဘို့ရာ အတော်ခက်ခဲမည် (ဒီအင်အေ ဆိုသည်မှာလည်းထိုခေတ်က မပေါ်သေး) ဖြစ်လေသည်။ ညာဒူးခေါင်း ပေါ်မှာ မြေပုံဆွဲထားသလို ထင်းထင်းကြီးပေါ်နေသော ထိုအမှတ်ကိုမြင်လျှင် စူးစမ်းသောအကြည့်ဖြင့် အကြည့်ခံရမှာ စိုးသောကြောင့် ဘောင်းဘီတိုဖြင့်ဝတ်စားသွားလာရမှာ ယနေ့တိုင်ပင် ကျွန်တော် ဝန်လေး နေတတ်ဆဲဖြစ်၏။ မြင်သာအောင်ပြောရလျှင် ကျွန်တော့်လို အမှတ်အသားမျိုး ဆိုဗီယက်သမ္မတဟောင်း ဂေါ်ဗာချော့မှာလည်းပါရှိရာ သူကနဖူးထိပ်မှာဖြစ်သဖြင့် ကျွန်တော့်ထက်ပို၍ သိသာထင်ရှားပြီး ကျော်ကြားသော အမှတ်တံဆိပ် ဖြစ်နေသည်။ စင်စစ် အမှတ်အကြောင်းတိုက်ဆိုင်၍ ပြောခြင်းသာဖြစ်ပြီး ကျွန်တော်နှင့် ဂိုဗာချော့ မည်သို့မျှနိုင်းယှဉ်အပ်သည်တော့မဟုတ်။ ပန်းတနော်လမ်းသားကဆိုလျှင် ကျွန်တော့်အမှတ်ကို ကြည့်ပြီး “မင်းကွာ အမှတ်ပါချင်ရင်လည်း နဖူးမှာပါလိုက်ပါလား ဂိုဗာချော့လို ခေါင်းဆောင်လေးဘာလေး ဖြစ်လိုဖြစ်ငြားပေါ့။ ကြံကြံဖန်ဖန် မင်းအမှတ်က ဒူးခေါင်းမှာ ဆိုတော့ ဟိုကခေါင်းဆောင် မင်းက အောင်းကောင် ဖြစ်နေတော့တာပေါ့” ဟု လူတောမတိုးသည့် ကျွန်တော့်ညဉ်ကို သွယ်ဝိုက်စွာနှိပ်ကွပ်ရင်း ပြောခဲ့ဘူးလေသည်။ 

ဤသို့လျှင် ဂျင်မခါနာမှာ အရာရာအကြောင်းကြောင်းဖြင့် မွေးဖွားခဲ့သောကျွန်တော် နောက်ထပ်ဆယ့်ရှစ်နှစ် အကြာမှာ ဂျင်မခါနာဘက်သို့ စက်ကျဖြစ်ခဲ့ပြန်သည်။ သည်တစ်ခါဆေးရုံမဟုတ် ဆေးရုံနှင့် ကပ်လျက်ခြံ ကို ဖြစ်ပြိး စက်ကျရာအကြောင်းက ကရာတေး ဟု အများ သိကြသော ဂျပန်ရိုးရာကိုယ်ခံပညာ ဖြစ်လေ၏။ ဆယ်တန်း ဒုတိယနှစ်ဖြေပြီးချိန်တွင် ကျွန်တော်တို့သုံးဦး (ထီးတန်းသား၊ ပန်းတနော်လမ်းသားနှင့် ကျွန်တော်) နွေရာသီမှာ အကျိုးရှိရာရှိကြောင်း တစ်ခုခုလုပ်ဘို့တိုင်ပင်ကြပြီးနောက် ကရာတေးသင်ဘို့ ဆုံးဖြတ်ကာ ပန်းတနော်လမ်းသား၏ ညီအကိုတော်တစ်ဦး၏ အဆက်အသွယ်ဖြင့် ထိုနေရာသို့ ရောက်ရှိခဲ့ ကြခြင်းဖြစ်လေသည်။ ကရာတေးကို အားကစားတစ်ရပ်အဖြစ် အစိုးရကအသိအမှတ်မပြုသေး သောကြောင့် နွေရာသီအားကစား သင်တန်းတွေဖွင့်လှစ်ရာ အောင်ဆန်းကွင်းလို နေရာမျိုးမှာ ကရာတေး သင်တန်းမရှိ (ဂျူဒိုသင်တန်းတော့ရှိသည်)။ သို့သော် ကရာတေးပညာရပ် လူငယ်များအကြား ရေပန်းစား ချိန်ဖြစ်ရာ (ဆာမူရိုင်းရုပ်ရှင်တွေ ဂျပန်ကိုယ်ခံပညာ ဇာတ်ကားတွေ ခေတ်စားချိန်မို့ ဖြစ်မည်။ ကိုရီးယား ဒရမ်မာတွေ ခေတ်စားသော ယခုအချိန်တွင် ကျားမပျိုအိုမရွေး ခေါင်းပေါ်မှာ မြောင်းဖေါ်ထားသလို ဖြူယော် ကြောင်ကျားဆံပင်များ တောထလာကြသည်မျိုးဖြစ်၏။ စကားချပ်။) ကျယ်ကျယ်ဝန်းဝန်း ရှိသောနေရာ တွေမှာ ကျွမ်းကျင်သူတွေ ဦးစီးဖွင့်လှစ်သော သင်တန်းများ အလျှိုအလျှိုထွက်ပေါ်လာကြသည်။ မစ်ရှင်လမ်း ဂျင်မခါနာ ဆေးရုံနံဘေးက ခြံကြီးထဲ၌ တိုက်ဂါးကရာတေးအသင်း ပေါ်ပေါက်လာခြင်းမှာ ထိုသဘောပင် ဖြစ်လေသည်။

မစ်ရှင်လမ်းနှင့်ရှမ်းလမ်း (ဖိုက်ချလမ်း) ဆုံရာမှသည်ဆေးရုံဝင်းတံတိုင်းအထိ ခြံကြီးမှာ နှစ်ဧကခန့် ကျယ်ဝန်းပြီး မီးရထားပိုင်မြေကွက်ဖြစ်၏။ အတွင်းမှာ အုတ်ပတ်ကားနှစ်ထပ်တိုက်အိမ်ကြီးတစ်လုံး တင်းနစ် ကစားကွင်းတစ်ကွင်းနှင့် အလုပ်သမားတန်းလျားများရှိရာ အိမ်ကြီးမှာမြန်မာ့ မီးရထားမှ အင်ဂျင်နီယာချုပ် မိသားစုတို့နေထိုင်ကြသည်။ တစ်ပတ်လျှင်သုံးရက် တင်းနစ်ကွင်းနှင့် အိမ်ကြီး ရှေ့ဘက် မြေကွက်လပ် တွေထဲမှာ အဆင့်အလိုက် နေရာခွဲပြီး ကရာတေးလေ့ကျင့်ကြသည်။ အိမ်ရှင်များက သဘောကောင်းသည့် အပြင် သူတို့၏သားသမီးများပါ တက်ကြွစွာပါဝင်ကြသည်မို့ မိသားစုအသင်း တစ်ခုပမာ ပျော်ရွှင်စွာ သင်ကြားလေ့ကျင့်နိုင်ခဲ့လေသည်။ နွေရာသီ ကျောင်းပိတ်ရက် ပြီးသည့်အခါ အချို့သင်တန်းသားတွေ မလာရောက်ကြတော့သော်လည်း အချို့ကဆက်လက် ကစားကြ၏။ ကျွန်တော်တို့မှာ စာမေးပွဲ အောင်စာရင်းကို ကစားရင်းစောင့်ကာ တက္ကသိုလ်တွေဖွင့်ပြန်တော့ ကျောင်းတက်ရင်းဆက်ကစား ကြလေသည်။ ပန်းတနော် လမ်းသားက နိုင်ငံရေးပိုးဝင်နေပြီမို့ ရက်မမှန်တော့။ နောက်ပိုင်း နိုင်ငံရေးမှုနှင့်ပင် ထောင်ကျပြီးလုံးဝအဆက်အသွယ်ပြတ် သွားသည်။ ကျွန်တော်နှင့် ထီးတန်းသားတို့သာ ရေဆုံးမြေဆုံး ဆက်လက်ကစားရင်း အသင်းတွင်ကျန်ရစ်၏။ ကျောင်းပြီး၍ဘွဲ့ရချိန်မှာ ခါးစည်းနက်အဆင့်သို့တိုင် ပြီးနောက် လုပ်ငန်းနယ်ပယ် အသီးသီးသို့ ဝင်ရောက်သည့်အချိန်ထိ အသင်းမှာကျွန်တော်တို့ရှိခဲ့ ကြသလို အသင်းတည်ရာအိမ်ကြီး၏ မိသားစုဝင်များနှင့်လည်း ဆွေမျိုးရင်းချာပမာ ခင်မင်ကာ ဝင်ထွက်သွားလာ ခဲ့ကြ၏။ ကျွန်တော့် ပထမဆုံး ဝန်ထမ်းအလုပ်ဖြစ်သော မီးရထားဘက်မှအလုပ်မှာ ထိုအိမ်ရှင် အင်ဂျင်နီယာချုပ် အန်ကယ်၏ အကူအညီဖြင့်ရရှိခဲ့ခြင်းဖြစ်လေသည် (အသိမရှိလျှင် အလုပ်တစ်ခုရဘို့ အင်မတန်ခက်ခဲသော ခေတ်ဖြစ်၏)။ 

ဂျင်မခါနာမှာမွေးပြီး ဂျင်မခါနာရပ်ဝန်းသို့ ပြန်လည်ရောက်ရှိခဲ့သောကျွန်တော် ထိုမှာပင် ဘဝတစ်ခုအစပြုဘို့ ကြုံလာပြန်သည်မှာတော့ ပဌာန်းဆက်လား ရေစက်လားဆိုရမည်သို့ရှိ၏။ ယင်းမှာ ဆေးရုံနှင့် မျက်စောင်းထိုး (ကရာတေးကလပ် တည်ရှိရာခြံကြီးနှင့် မျက်နှာချင်းဆိုင်) မစ်ရှစ်လမ်းမပေါ်တွင် မရွှေတောက်တို့ နေထိုင်ခဲ့ကြခြင်းပင်ဖြစ်သည်။ ပြောရလျှင် မရွှေတောက်သည်ပင် ဂျင်မခါနာမှာ ကျွန်တော် မွေးပြီးခြောက်နှစ်အကြာ၌ မွေးဖွားခဲ့သူဖြစ်ပြီး ကျွန်တော်နှင့်အကြောင်းပါပြီးနောက် ရင်သွေးသုံးဦးအနက် သားနှစ်ဦးကိုဂျင်မခါနာမှာပင် တက်ရောက် မွေးဖွားခဲ့ပါ၏။ သမီးကိုတော့ ဆေးရုံတက်ရန်ရက်ချိန်းစောင့် နေစဉ် ဗိုက်နာခိုက် အလည်ရောက်လာသော သူနာပြုဆရာမနှင့် အိမ်မှာပင်မွေးဖွားခဲ့လေရာ သူကလေးလည်း ဂျင်မခါနာသူဟု ပြောလျှင်မမှား ဟုထင်သည်။ အိမ်ထောင်ကျပြီး ကျွန်တော့်အလုပ်ရှိရာ ဒလဘက်ကမ်းသို့လိုက်နေသော မရွှေတောက်ကိုအကြောင်းပြု၍ သူ့မိဘအိမ်သို့ဝင်ထွက်နေပြန်ရကား ကျွန်တော်နှင့်ဂျင်မခါနာတို့ ဝေးကွာသည် ဟူ၍မရှိသလောက် ဆိုရမည်ဖြစ်ပေသည်။ 

အရေးအခင်းကာလ ဆေးရုံဂိုဒေါင်တွေဖေါက်ပြီး (မစားရက်လောက်တက်ဆိုသလို) ဆေးရုံသုံး ကိရိယာတွေ လမ်းမပေါ်မှာ မတန်တဆေး ချရောင်းခဲ့ကြသည်ကို၎င်း၊ နဝတ အစိုးရတက်လာပြီး နောက်ပိုင်းတွင် ဗဟိုအမျိုးသမီးဆေးရုံ တိုးချဲ့ဆောက်လုပ်ရန် အလို့ငှါ ကပ်လျက်မီးရထားဝင်းအား သိမ်းပိုက်လိုက်ကြသည်ကို၎င်း စိတ်မသက်သာစွာ မြင်ခွင့်ကိုလည်းရရှိခဲ့ပါ၏။ ထိုအချိန် ကျွန်တော်သည် ဒလဘက်ကမ်းမှ ရန်ကုန်ဘက်ကမ်းသို့ ပြောင်းရွှေ့တာဝန်ချထားခံရပြီး အိုးပိုင်အိမ်ပိုင်လည်းမရှိသည်မို့ မရွှေတောက်၏မိဘ (ကျွန်တော့် ယောက္ခမ) များနှင့်အတူ နေထိုင်နေရပြီဖြစ်လေသည်။ မီးရထားဝင်းကို သိမ်းကာစ၌ အိမ်ကြီးမှအပ ကျန်သောအဆောက်အအုံများကို ဖျက်သိမ်းပြီး ဆေးရုံနှင့်ပတ်သက်သော အဆောက်အဦများ စကင်ဆောက်လုပ်ခဲ့သည်။ အိမ်ကြီးကို မူလပုံစံအတိုင်းဆေးသုတ်မွမ်းမံပြီး ဆရာဝန်ကြီး နေအိမ်အဖြစ် နှစ်အနည်းငယ်ဆက်လက်ထားရှိခဲ့ရာမှ နောက်ပိုင်းတွင် အပြီးတိုင်ဖြိုဖျက်ကာ လက်ရှိ ဆေးရုံနှင့်ဆက်စပ်လျက် အသစ်ပြန်လည် တည်ဆောက်ခဲ့လေသည်။ ကျွန်တော့်အာရုံထဲမှာ တရုပ်ကပ်ပြတင်းနှင့်ဆင်ဝင်မြင့်မြင့် မှန်တံခါးအပြည့်ဧည့်ခန်းနှင့် အိပ်ခန်းကျယ်များ ပါဝင်ဖွဲ့စည်းအပ်သော အုဌ်ကျွပ် အုဌ်ရိုး အမိုးနီနီ အသားမြေဆီရောင် ကိုလိုနီခေတ်နှောင်းပိုင်း ဗိသုကာလက်ရာ အဆောက်အဦ ကြီးကို တသစွာမြင်ယောင်ဆဲ။ ကျွန်စော်နံသည်ပဲဆိုဆို။

သူများအပျက်တွေပြောပြီး ကိုယ့်အပျက်ကိုယ်ပြောရလျှင် ဆေးရုံသက်တမ်း နှစ်တစ်ရာပြည့်သည့် ၁၉၉၇ ခုနှစ် သို့ ရောက်သောအခါ ပြည်တွင်း မှာ ကျွန်တော်မရှိတော့။ ကုလားမကြီးနို့စို့ဘူးသူပြီပြီ ကြာဖူးနားဝ ကုလားသံ နှော၍ပြောရပါက ဘိုင်ဆပ်တွေကို ကြောက်လွန်း သောကြောင့် ယေး ဒိုး တင်း ဆလံသကာ ခါနာမကောင်း မာလကာမဂျောင်းခင် ပြာတာကောင်းအဖြစ် (အကျိုးများလိုများငြား ယိုးဒယားကို ကိုးစားလျက်) ကပျာကယာ ညောင်းခဲ့ပြီဖြစ်၏။ အိမ်ရှေ့မှဆေးရုံ နှစ်တစ်ရာပွဲတော် ကျင်းပခဲ့ကြသလားမသိ မကြားမိ။ ထိုအချိန် မရွှေတောက်တို့ နန်းတွင်းမှာလည်း ထီးမွှေနန်းမွှေ ဆက်ခံရန်အရေး ရှုပ်ထွေးစပြုပြီ။ စင်စစ် သူတို့မှာလည်း ပြည်တွင်း ပြည်ပရန်စွယ် (သွေးသား အရင်းအခြာနှင့် သွေးနှောစွက်ဖက်ကြသူများ) တွေက မသေးလှ (မှတ်တမ်းဝင်စကား ပြောရလျှင် ထိုအထဲတော့ ကျွန်တော်မပါ)။ ခရစ်သက္ကရာဇ် ၂၀၀၀ သို့ ကူပြောင်းပြီး နှစ်မှမလည်သေးခင် ထိုပယောဂဖြင့်ပင် အညီအညွတ်ပြိုကွဲကြကာ ဂျင်မခါနာ ရပ်ဝန်းကို အပြီးတိုင် သူတို့စွန့်ခွာကြလေ၏။ သူတို့တွေစွန့်မှတော့ ဒုတိယတန်းစားမိသားစုဝင် ဂျငိမခါနာသား ကျွန်တော် ဂျင်မခါနာမှာ ပျော်ခွင့်ကို မျှော်ချင့်၍မရပြီ။ 

မရွှေတောက်တို့အစုအတွင်း သူတစ်လူငါတစ်မင်းတွေနှင့်အတူ ကျွန်တော်ပါစီးမျောရင်း ဘောက်ထော် လိုလို စမ်းချောင်းလိုလို ဟိုအကွေ့ သည်အကွေ့တွေမှာ ခေတ္တခဏရပ်တန့်ကြလျက်က နောက်ဆုံးတွင် ပေါရိသလမ်းကဗျာထဲကလို ဘာမဆိုတာဝေငှသော်လည်း ရာဇဂြိုလ် မဟုတ်သည့် သာကေတ ဘက်မှာ နာဂစ်မုန်တိုင်းနှင့် မရှေးမနှောင်းဆိုသလို အခြေချဖြစ်ခဲ့ကြသည်။ သည်မှာ ခေါင်းချသူတွေချ အပြောင်းအလဲ မလှစွာ မြောင်းထဲကျသူတွေကျနှင့် လူ့သမိုင်းကို ကြုံရာကဏ္ဍအသီးသီးမှာဆက်လက်ကပြရင်း ရှင်သန်နေ ကြဆဲ။ သည်လိုနှင့် မရဏစင်မြင့်ပေါ်တက်ဘို့ အခေါ်စောင့်ကြသည့်အထဲ ရှေ့ဆုံးတန်းမှာပင် ကျွန်တော် ထိုင်ခုံရနေပြီ။ ဂျင်မခါနာဘက်သို့ အရောက်အပေါက် နည်းသွားသလို မျိုးဆက်သစ်တွေ၏ မွေးခြင်းဖွားခြင်း ကိစ္စရပ်များမှာလည်း သူတို့၏ ရွေးချယ်မှုထဲမှာ ဂျင်မခါနာပါဝင်ဟန် မတူတော့။ တစ်ခါတစ်ရံ ဖြတ်သန်း သွားလာခိုက် ငဲ့စောင်းကြည့်မိသည့်အခါများ၌ အနည်းဆုံး မစ်ရှင်လမ်း (မင်းရဲကျော်စွာလမ်း) ပေါ်က အဆောက်အအုံတွေ ပုံစံပြောင်းသွားကြသည်ကို တွေ့မြင်ရလေသည်။ ငိုအားထက် ရယ်အားသန် ဆိုသလို ပြောရလျှင် ဆေးရုံရှေ့မျက်နှာစာရှိ ယ္ခင်ဝင်းခြံတွေ အားလုံးနီးပါး၏ နေရာမှာ အထပ်မြင့်အဆောက်အဦများ နေရာယူလာကြရာ၌ မရွှေတောက်တို့၏နေအိမ်ကတော့ ယ္ခင်ပုံစံမပျက် သစ်သစ်လွင်လွင် (ထိန်းထိန်း သိမ်းသိမ်း) ကျန်ရှိနေခြင်းဖြစ်၏ (ကိုယ်မပိုင်တော့သည်သာ ထောက်ပြစရာစရာရှိသည်)။

ထိုအချိန် ဗဟိုအမျိုးသမီးဆေးရုံ ယ္ခင်ဒပ်ဖရင်ဆေးရုံ သို့မဟုတ် ကျွန်တော့်သညာ ဂျင်မခါနာဆေးရုံ အသက် ၁၂၀ ပြည့်မြောက် ကြောင်းသတင်းက လျှပ်ပြက်သလိုပေါ်လာသည်။ ထိုလျှပ်စီး ရင်တွင်းအထိ လင်းလက် သွားသည့်အပေါ် ထူး၍ကျွန်တော် မအံ့သြလို။ မည်သည့်အမည်ဖြင့်ပင်ဖြစ်စေ နှင်းဆီသည် မွှေးမြဲ ဆိုသကဲ့သို့ သည်ဆေးရုံကိုဗဟိုပြုသော ဂျင်မခါနာရပ်ဝန်းသည် ကျွန်တော့်ရင်ထဲမှာတော့ အခါမလပ် ဆွတ်ပျံ့ဘွယ်သာ ရှိနေမှာ သေချာ၍ပါတည်း။



Comments

Popular posts from this blog

ကျွန်တော်နှင့် တိုက်ပုံ