ပြားခြောက်ဆယ်ကုန်ရင်
တိရစ္ဆာန်ရုံဝင်ပေါက်
သုံးဘီးနဲ့ရောက်တဲ့ခေတ်တစ်ခုရဲ့
မိသားစုတနင်္ဂနွေနေ့တစ်နေ့မှာ
ခင်ဗျားကိုစတွေ့ဘူးခဲ့တာ။
အများကလေးတွေနဲ့အတူ ခင်ဗျားကိုချစ်
ကြံပိုင်းလေးပစ်ကျွေးရင်း တစ်ကြော်ကြော်
‘မိုမို’လို့ခေါ်ပြီးပျော်ခဲ့ဘူးပေမဲ့
ကျွန်တော်နဲ့ခင်ဗျား ရွယ်တူတန်းတူတွေမှန်း
မသိခဲ့တာလဲမဆန်းပါဘူးလေ။
ဆယ်နွေလွန်မြောက် နောက်တစ်ခေါက်
ချစ်သူနဲ့လျှောက်လည်ရင်းရောက်ပြန်တော့
ခြေမြှောက်လည်မော့ ကြော့ကြော့လေးကနေတဲ့
ခင်ဗျားရဲ့ဟန်ကိုမြင် ဆင်မယဉ်သာ
အချစ်နဲ့တူလိုက်တာလို့ ချိုသာကျီစယ်
ရယ်သံတိုးညှင်း ကိုယ်သင်းယနံ့ထုံစွာ
နေ့ခင်းကြီးလမင်းသာသလို ဘဝမှာနေပျော်တဲ့အချက်
နုတ်ဆက်ဘို့ကိုအသာထား ခင်ဗျားနားမလည်နိုင်မဲ့
တောင်းပန်စကားလေးတောင်မှမဆိုမိ
သည်လိုနဲ့နောက်တစ်ခါ သားသမီးတွေနဲ့လာပြန်တော့
ချီကာပိုးကာ ခင်ဗျားကိုမြင်သာအောင်ပြ
ပီတိခြင်းကမတူ ရင်တော့ပူတတ်နေပြီ
လူသားတစ်ယောက်ရဲ့မျိုးဆက်
မူဝါဒဘယောက်ဘယက်အောက်မှာ
ပျောက်ခဲ့တဲ့ငွေအကြွေလို တန်ဘိုးတွေမဲ့မသွားရအောင်
ဘယ်လိုများပျိုးထောင်ရပါ့ ပြင်းပြတဲ့ဝေဒနာ
သွားလေရာပါသမို့ နောက်တစ်ခါမလာဖြစ်တာခွင့်လွှတ်ပါ။
သတ္တာဘုံသား ခင်ဗျားမှာလဲ
ပျော်စရာမော်စရာ ဝေဒနာရယ် ဒဏ်ရာရယ်
စာနာထောက်ထားမှုရယ်ရှိမှာ အသေအချာပါ
ကမ္ဘာပြားကြီးထဲမှာတစ်ချိ့ကျတော့
ငို့ဘကလွဲရင် ဘာမှမသိ
သဘာဝသော ပသာဒသော ဝေနေယျသော ဂေဟသော
တောမသိတောင်မသိ ဒီလူတွေကြည့်ပြီး
စိတ်ထိခိုက်တာမျိုးလည်းရှိမှာပဲ
ဒါပေမယ့် ဘဝတဏှာကို ရိုးသားစွာဖက်တွယ်ပြီး
ကြီးပြင်းလာတဲ့ခင်ဗျား လေးစားစရာပါ။
အာဏာမူးယစ်သူတွေ အသပြာထုဆစ်သူတွေအကြား
နင်းပြားဘဝမကျအောင် စဉ်းစားရသမျှရှောင်ရင်း
ထမင်းယောင်ယောင်တစ်ဆုပ်ဖန်တီးရတဲ့အလုပ်ကို
ဒုက္ခ ပြောလို့ရရင် ကျုပ်ကပိုများ
ခင်ဗျားဆီမရောက်အားပေမဲ့
ရှည်လျားထွေပြား မနေမနားသွားခဲ့သရွေ့
ခုဆို ခြောက်ဆယ်ကွေ့ပင် ကျော်ပါပေါ့။
တစ်မြန်မနေ့ သတင်းထဲတွေ့မှ
မွေးနေ့ရှင်ခင်ဗျား ပရိဿတ်ကြားမှာ
ကျန်းကျန်းမာမာ ဝမ်းလည်းသာပါတယ်
ဘယာတွေလွန်ရစ် အလင်းခေတ်တစ်ခုအစ
ခြောက်ဆယ့်နှစ်သမယမှာ အဝေးကနေဆုတောင်း
ခင်ဗျား အိုဇာတာကောင်းပါစေ ‘မိုမို’ ရေ။
အရွယ်တူသူအိုနှစ်ယောက် လောကထဲကမပျောက်ခင်
ခရီးပေါက်တဲ့အခါ ခင်ဗျားရှေ့မှောက်
မြေးတွေပို့ရင်း အရောက်လာဦးမှာပါ။
[ပြီးခဲ့သော၂၀၁၅ အောက်တိုဘာလ ရန်ကုန်တိရစ္ဆာန်ဥယျဉ်က ဆင်မလေးမိုမို၏ ၆၁ နှစ်မြောက်မွးနေ့ အမှတ်တစ်ရအဖြစ် ရေးဖွဲ့ကာအမှတ်မထင်သည်အတိုင်းထားခဲ့မိသောကဗျာ]
No comments:
Post a Comment